മൂന്ന് പേരെ കൊന്ന കേസ് പ്രതി ജയിലിൽ നൽകിയ ‘സ്നേഹം’; ജാപ്പനീസ് വിദ്യാർത്ഥിയുടെ ജീവിതം മാറ്റിയെഴുതിയ അവിശ്വസനീയ സൗഹൃദം!

ബംഗളൂരു: 2019-ൽ ഇംഗ്ലീഷ് പഠിക്കാനായി ബംഗളൂരുവിൽ എത്തുമ്പോൾ ബംഗളൂരു സെൻട്രൽ ജയിലിലായിരിക്കും തന്റെ ജീവിതം ചെന്നെത്തുക എന്ന് ജാപ്പനീസ് വിദ്യാർത്ഥിയായ ഹിരോതോഷി തനക ഒട്ടും കരുതിയിരുന്നില്ല. പഠിച്ചിരുന്ന ഇംഗ്ലീഷ് അക്കാദമിയിലുണ്ടായ തർക്കത്തെത്തുടർന്ന് അറസ്റ്റിലായ തനകയ്ക്ക് 19 ദിവസമാണ് ജുഡീഷ്യൽ കസ്റ്റഡിയിൽ കഴിയേണ്ടി വന്നത്.

ഇന്ത്യയിലെ നിയമസംവിധാനങ്ങളെക്കുറിച്ച് വലിയ അറിവില്ലാതിരുന്ന തനകയ്ക്ക് ജയിൽ വാസം തികച്ചും ആശയക്കുഴപ്പമുണ്ടാക്കുന്ന ഒന്നായിരുന്നു. എന്നാൽ ആ ഭയത്തിനും അനിശ്ചിതത്വത്തിനുമിടയിലും ഇയാൾ ചില അപ്രതീക്ഷിത ആശ്വാസങ്ങളും അപൂർവ്വമായൊരു സൗഹൃദവും കണ്ടെത്തി. വിദേശ തടവുകാർക്കായി മാറ്റിവെച്ച, ഇംഗ്ലീഷ് സിനിമകൾ പ്രദർശിപ്പിച്ചിരുന്ന മുറിയിൽ ഇയാൾ പതിവായി പോയിരുന്നു. അവിടുത്തെ അന്തേവാസികൾ ഉണ്ടാക്കിയിരുന്ന തക്കാളി കറിയും സിനിമകളുമായിരുന്നു തനകയുടെ പ്രധാന ആശ്വാസം. അന്തേവാസികളുടെ ആരോഗ്യത്തിന് വേണ്ടി ഉപ്പും എരിവും കുറച്ചാണ് ജയിലിലെ സാമ്പാർ ഉണ്ടാക്കിയിരുന്നതെങ്കിലും അതിൽ ഉപയോഗിച്ചിരുന്ന പച്ചക്കറികൾ പുതിയതായിരുന്നു എന്ന് തനക ഓർത്തെടുക്കുന്നു.

ചില തടവുകാരിൽ നിന്ന് ഭീഷണി നേരിട്ടതിനെ തുടർന്ന് ഇയാളെ ജയിൽ ആശുപത്രിയിലെ മാനസികാരോഗ്യ വാർഡിലേക്ക് മാറ്റിയിരുന്നു. എങ്കിലും ചില ജയിൽ ഉദ്യോഗസ്ഥരിൽ നിന്ന് ലഭിച്ച പിന്തുണ വലുതായിരുന്നുവെന്ന് തനക പറയുന്നു. ചീഫ് സൂപ്രണ്ട് തന്റെ ഓഫീസിൽ പ്രവേശിക്കാനും കമ്പ്യൂട്ടർ ഉപയോഗിക്കാനും അനുവാദം നൽകിയിരുന്നു.

എന്നാൽ തനകയ്ക്ക് ജയിലിൽ ലഭിച്ച ഏറ്റവും വലിയ പിന്തുണ മൂന്ന് പേരെ കൊലപ്പെടുത്തിയ കേസിൽ ശിക്ഷ അനുഭവിക്കുന്ന ശങ്കർ എന്ന തടവുകാരനിൽ നിന്നായിരുന്നു. ക്രൂരമായ കുറ്റകൃത്യത്തിന്റെ പശ്ചാത്തലമുണ്ടായിരുന്നെങ്കിലും ക്രിസ്തുമതത്തിൽ കടുത്ത വിശ്വാസിയായി മാറിയ ശങ്കർ ജയിലിലെ അപരിചിതമായ സാഹചര്യങ്ങളിൽ തനകയുടെ അടുത്ത സുഹൃത്തായി മാറി. വിഡിയോ കോൺഫറൻസ് വഴിയുള്ള കോടതി വാദങ്ങളിൽ തനകയ്‌ക്കൊപ്പം പങ്കെടുത്ത ശങ്കർ, ജാമ്യത്തിനായുള്ള പണം കണ്ടെത്താൻ കഴിയാതെ വിഷമിച്ചപ്പോഴും ഒപ്പം നിന്നു. ശങ്കറിന്റെ സഹായമില്ലായിരുന്നെങ്കിൽ തനിക്ക് ജയിലിൽ നിന്ന് പുറത്തിറങ്ങാൻ സാധിക്കുമായിരുന്നില്ലെന്ന് തനക പറയുന്നു.

ഹുബ്ലി സ്വദേശിയായ ശങ്കറിനെ 2020 ജനുവരിയിൽ വിജയപുര ജയിലിലേക്ക് മാറ്റി. പിരിയുന്നതിന് മുൻപ് തന്റെ ബാഗും താക്കോലുകളും തനക ശങ്കറിന് സമ്മാനമായി നൽകി. വർഷങ്ങൾക്ക് ശേഷവും ആ സൗഹൃദം തനക നന്ദിയോടെ ഓർക്കുന്നു. ശങ്കർ തന്റെ ജീവിതത്തിലെ വളരെ പ്രധാനപ്പെട്ട വ്യക്തിയാണെന്നും അദ്ദേഹത്തെ വീണ്ടും കാണാൻ ആഗ്രഹിക്കുന്നുണ്ടെന്നും തനക വ്യക്തമാക്കി.

തനകയുടെ നീണ്ട നിയമപോരാട്ടത്തിൽ 19 ദിവസത്തെ ജയിൽവാസം ഒരു അധ്യായം മാത്രമായിരുന്നു. പിന്നീട്, തനകയെ അനാവശ്യമായി ജുഡീഷ്യൽ കസ്റ്റഡിയിൽ പാർപ്പിച്ചതായി കണ്ടെത്തിയ കർണാടക സംസ്ഥാന മനുഷ്യാവകാശ കമ്മീഷൻ 75,000 രൂപ നഷ്ടപരിഹാരം നൽകാൻ ശുപാർശ ചെയ്യുകയും 2026-ൽ ഈ തുക ഇയാൾക്ക് ലഭിക്കുകയും ചെയ്തു. എങ്കിലും തനകയെ സംബന്ധിച്ചിടത്തോളം ആ ജയിൽ ഓർമ്മകൾ ഭയത്തിന്റേത് മാത്രമല്ല; ഇംഗ്ലീഷ് സിനിമകളുടെയും തക്കാളി കറിയുടെയും സൂപ്രണ്ടിന്റെ ഓഫീസിലെ കമ്പ്യൂട്ടറിന്റെയും, അതിലുപരി ഒരു സഹതടവുകാരനുമായി ഉടലെടുത്ത അവിസ്മരണീയമായ സൗഹൃദത്തിന്റേതു കൂടിയാണ്.

ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]